भुटानी शरणार्थी बेलडाँगी शिविरमा गोविन्द रिजालको असामयिक निधन, समुदायमा शोकको छायाँ झापा, बेलडाँगी — भुटानी शरणार्थी बेलडाँगी बस्तीमा बस्दै आएका भुटानी शरणार्थी अपाङ्गता संघ (BRAD) का कार्यक्रम प्रबन्धक गोविन्द रिजालको असामयिक निधन भएको छ। ४५ वर्षीय रिजालले आफ्नै छाप्रोमा झुण्डिएर आत्महत्या गरेका हुन्। उनको निधनको खबरले सम्पूर्ण शरणार्थी समुदायमा गहिरो शोक र स्तब्धता फैलिएको छ।
रिजालकी श्रीमती सुदर्सनी अधिकारीले उनलाई बेलडाँगी-D2-169 स्थित छाप्रोमा मध्यरात १२:१९ बजे झुण्डिएको अवस्थामा फेला पारेकी थिइन्। घटनापछि समुदायमा शोकको वातावरण छाएको छ, र धेरैले रिजालको आत्माको चिरशान्तिको कामना गर्दै परिवारप्रति समवेदना प्रकट गरेका छन्। भुटानी शरणार्थी बस्ती व्यवस्थापन समितिले पनि एक शोक विज्ञप्ति जारी गर्दै गोविन्द रिजालको असामयिक निधनप्रति दुःख व्यक्त गरेको छ। विज्ञप्तिमा उल्लेख गरिएको छ कि रिजालको निधनले सम्पूर्ण समुदायमा ठूलो क्षति पुगेको छ। समितिले स्वर्गवासी आत्माको शान्तिको कामना गर्दै परिवारलाई धैर्य धारण गर्ने शक्ति मिलोस् भन्ने आशा व्यक्त गरेको छ।
गोविन्द रिजाल, जसले शरणार्थी समुदायको सेवा गर्दै आएका थिए, उनको यो असामयिक निधनले शरणार्थी जीवनका संघर्ष र चुनौतीप्रति पुनः ध्यानाकर्षण गराएको छ। बस्तीका अन्य विभिन्न संस्थाहरू र स्थानीय समुदायले पनि रिजालको योगदानको कदर गर्दै उनलाई श्रद्धाञ्जलि अर्पण गरेका छन्। उनको अन्तिम संस्कार सम्बन्धी जानकारीहरू पछि सार्वजनिक गरिनेछ।
भुटानी शरणार्थी बस्ती व्यवस्थापन समितिको विज्ञप्ति
